نسرين زريق
بتزتلك وزارة التجارة كلمة سجل تجاري عأساس قضامة القصة ..
سجل يعني شركة وتأسيسها و ٥ ملايين بالبنك
سجل يعني ايجار مكان بيلحق ٥ ملايين تانيات بالسنة
سجل يعني مالية وبراءة ذمة بيلحق نص مليون
سجل يعني ٢ موظفين اجباري عنك مسجلهم بالتأمينات بيلحق ربع مليون بالشهر
سجل يعني اشتراك بغرفة التجارة ورسوم هون وهون
سجل يعني بضاعة ودورية جمرك تتبلى عليك مشان شريطة بزاوية البيجاما بيسفقك غرامة بالملايين يا بتدفع رشوة بالملايين لتنفد
سجل يعني محل وديكور وماركة وتسجيل ماركة وطباعة اكياس وورق
سجل يعني آرمة أرخص وحدة بمليونين ليرة
سجل يعني تموين وضرايب
سجل يعني فواتير كهربا ومي
سجل يعني السعر ٣ اضعاف باختصار لتغطي تكاليف. بس ليكفي الحكومة متطلباتها وتحملهم عسعر البضاعة وبعدين بيحاربو الغلاء وبيسبوا التجار بكل قوة قلب .
سجل مشان بيع عالانترنت ما اتقدم هالقرار ولا بدولة بالعالم .. ولا حدا بيتجرأ يجبر الناس الا عالشغل اما يجبرهم عالاغلاق فبده معناها نصير حرامية ونسرق بعض او نتركلهم البلد .. وطبعا اذا صرت حرامي بسورية فالمجد الك بتنضربلك تحيات السلام وممكن تصير بمجلس الشعب
ووحياة عين الوزارة تجارة ومالية .. لا تاركين البلد ولا رح نصير حرامية .. وضلكم حطولنا عصي بالشغل و رح نضل نلاقي برمة لنشتغل بدون ما ننفع مرتشيكم وفاسدينكم بفرنك .
بالنسبة لضبط الجودة والرقابة للبيع عالانترنت فبتقدروا تعملوا رقم لشكاوي المواطنين وتتابعوا الموضوع للمخالفين قانونا واصولا .. مو صعبة القصة متل ما بتلقطوا كلمة شئسمو عالواتس اسم الله حولكم
قال علق بنقطة ليصل السعر .. علقوا بنقطة ليصلكم سعر الشوكولا لشوف ياحبايب.
( عن صفحة الزميلة نسرين زريق – بعد مشروعها الجميل لتجارة الشوكولا )